यी ३ प्रश्नको चित्तबुझ्दो जवाफ नआए माधव नेपाल सहित ११ सांसद कारबाहीमा पर्ने

  • प्रकाशित मिति : May 23, 2021
  • लोकतान्त्रिक संवाददाता

९ जेष्ठ, काठमाडौँ | नेकपा एमाले अध्यक्ष केपी शर्मा ओलीले आफ्ना विरोधी गुटका सांसदहरु माधवकुमार नेपाल, झलनाथ खनाल, भीम रावल र बाँकी ९ जना सांसदलाई २४ घण्टे समयसीमा तोकेर स्पष्टिकरण पत्र पठाएका छन्।
आफूले सोधेको स्पष्टिकरणको जवाफ चित्तबुझ्दो नभएमा उनीहरुलाई पार्टीबाटै निष्काशन गर्ने तयारी ओलीले गरेका छन्।

यता नेपाल पक्षले नयाँ पार्टी खोल्ने तयारी गरेको छ। तर पार्टीबाट आफै निष्कनु भन्दा ओलीले नै निकालेको भन्ने सन्देश प्रवाह होस् भन्ने यो पक्षका नेताहरुले चाहेका छन्।

अध्यक्ष ओलीसँगै बस्ने सम्भावना नेपाल पक्षको छैन तर ओलीले कारबाही गरि पार्टीबाट निकाले सहज हुने सोच उनीहरुको रहेकोछ ।

नेपाल पक्षका २६ जनाले शुक्रबार विपक्षी नेपाली कांग्रेस सभापति शेरबहादुर देउवालाई प्रधानमन्त्री स्वीकार गरी नयाँ सरकार निर्माणका लागि हस्ताक्षर गरेका थिए।

तर ओलीले ती मध्ये ११ जनालाई मात्रै स्पष्टिकरण सोधेका हुन्।

पार्टी प्रवक्ता प्रदीप ज्ञवालीले केही सांसदहरुले आफ्नो हस्ताक्षरको दुरुपयोग भएको भनेको र केहीले नेता नेपाललाई प्रधानमन्त्री बनाउने भनेकाले हस्ताक्षर गरेको भनेकाले उनीहरुलाई थप सोधपुछ गरेपछि मात्रै स्पष्टिकरण सोध्ने बताएका छन्।

बागमती प्रदेशको राष्ट्रियसभा सदस्यको निर्वाचनमा नेपाल पक्षले ओली निकट बादललाई हराउन विपक्षीको साथ लिएको थियो। वैशाख २७ गते ओलीले विश्वासको मत लिनेक्रममा यो पक्षका २८ जना सांसदहरु संसदमा अनुपस्थित थिए।

स्पष्टिकरण पत्रमा सोधिएका प्रश्नहरु निम्न बमोजिम रहेका छन्
१. आफूले विश्वासको मत लिनेक्रममा पार्टीको ह्वीप किन उल्लंघन गरेको हो?

२. नयाँ सरकार गठनका क्रममा विपक्षीलाई साथ किन दिएको भन्ने प्रश्न पनि पत्रमा समावेश गरिएको छ।

३. साथै बागमती प्रदेशको राष्ट्रियसभा सदस्यको निर्वाचनमा पार्टी ह्वीप किन उल्लंघन गरेको हो भन्ने प्रश्न पनि गरिएको छ।